ပြီးခဲ့သောရက်များအတွင်းက အမေရိကန်နိုင်ငံတွင် မိန်းမဘဝမှ ယောက်ျားအဖြစ်ပြောင်းလဲထားသူတစ်ဦးမှ ကလေးမွေးဖွားသည့်သတင်းအား တစ်ကမ္ဘာလုံးမှ စိတ်ဝင်စားခဲ့သည်။ ယခုအခါ အဆိုပါကလေးကို မွေးဖွားခဲ့သူ သောမတ်စ် ဘီတီက ၎င်း၏ ကလေးငယ်အား ဓာတ်ပုံရိုက်ခွင့်ပြုလိုက်ပြီဖြစ်သည်။ ဘီတီသည် လွန်ခဲ့သော သီတင်းသုံးပတ်ခန့်က မျက်လုံးပြာပြာနှင့် သမီးငယ်လေးအား မွေးဖွားခဲ့ခြင်းဖြစ်သည်။ (၃၄) နှစ်အရွယ်ဘီတီသည် သူ၏သမီးငယ်လေးအား ဇွန်လ (၂၉) ရက်၊ ည (၈း၅၅) မိနစ်တွင်ဖွားမြင်နိုင်ပြီးနောက် ကမ္ဘာပေါ်တွင် လိင်ခွဲစိတ်မှုဖြင့် ယောက်ျားဘ၀သို့ပြောင်းလဲပြီး ပထမဆုံးတရားဝင် ကလေးမွေးဖွားသူအဖြစ် မှတ်တမ်းတင်နိုင်ခဲ့သည်။ သမီးငယ်လေးအား ဆူဆန်ဟုအမည်ပေးထားကြောင်း ဘီတီနှင့် ဇနီးဖြစ်သူ နန်စီတို့က ပြောပြသည်။ ထိုအမည်အား ဘီတီ၏မိခင်ဖြစ်သူက ပေးထားခြင်းဖြစ်သည်။ ယခုအခါတွင် ဘီတီသည် သမီးငယ်ဆူဆန်နှင့်အတူ ပျော်ရွှင်စွာဓာတ်ပုံအရိုက်ခံရင်း ယခုလိုကလေးမွေးဖွားနိုင်မှုအတွက် အလွန်ဂုဏ်ယူကြောင်း ပြောကြားသွားခဲ့သည်။
Guest.
It's 03:55 PM - Myanmar time.
